राँझा (बाँके), २५ कात्तिकः रसुवाको भोटेकोशीमा गत भदौ १० गते आएको बाढीमा परी गाउँका पाँच जना बेपत्ता भएपछि बाँकेको नेपालगञ्ज उपमहानगरपालिका–२० स्थित थपुवा गाउँमा यस वर्ष तिहारको रमझम छैन ।
बाढीमा परी गाउँका पाँच जना बेपत्ता भएपछि स्थानीयवासीले यस वर्ष देउसीभैलोसमेत खेलेनन् । बेपत्ताहरूको परिवार शोकमा रहेकाले गाउँमा तिहारको उल्लास नभएको स्थानीयवासी टेकराज जैसीले बताउनुभयो ।
बाढीमा परी रसुवा भन्सार कार्यालयको टिमुरे क्षेत्रमा काम गर्ने थपुवाका ५३ वर्षीय शेरसिंह रोकाय, उहाँकी ५६ वर्षीया श्रीमती विष्णुमती रोकाय, १९ वर्षीय दीपक रोकाय तथा आराम दमाई र उजना दमाई बेपत्ता भएका हुन् । उनीहरू बेपत्ता भएपछि गाउँमा यस वर्ष तीज, दसैँ र तिहारका खुसीयाली शोकमा परिणत भएको जैसीले बताउनुभयो ।
दाजु शेरसिंह र भाउजू विष्णुमतीलाई भेट्न तथा पवित्र तीर्थस्थल गोसाइँकुण्ड घुम्न गएका १९ वर्षीय दीपक पनि बाढीपछि बेपत्ता हुनुभयो । एक्लो छोरासहित दाजु र भाउजू एकैपटक बेपत्ता भएपछि थपुवाका अनलाल रोकाय गहिरो शोकमा हुनुहुन्छ ।
बुढेसकालको सहारा एक्लो छोरा र अभिभावकका रूपमा रहेका दाजु–भाउजूको अवस्था अज्ञात भएपछि रोकाय परिवार उनीहरू फर्किने आशामा दिन काटिरहेको छ । परिवारका सदस्यको प्रतीक्षामा रहेको घर अहिले शोकमा डुबेको छ ।
रोजगारीका लागि रसुवा पुगेका आराम दमाई र उजना दमाई पनि बाढीपछि बेपत्ता हुनुभएको छ । उहाँहरूका १६ वर्षीय छोरा सुभाष नेपाली, ११ वर्षीय छोरा अश्विन र नौ वर्षीया छोरी स्मारिका आमा–बुवा फर्किने आशामा छन् । आमाबुवा दुवै बेपत्ता भएपछि तीन सन्तानको बिचल्ली भएको छ ।
“गाउँका पाँच जना बेपत्ता भएपछि परिवारजन असह्य पीडामा छन् । यो अकल्पनीय शोकका कारण गाउँवासीले यस वर्ष तिहार मनाउन सकेनन्”, जैसीले भन्नुभयो ।
उहाँका अनुसार पर्व मनाउनुभन्दा बेपत्ता परिवारलाई सान्त्वना दिन र दुःखमा साथ दिन गाउँवासी जुटेका छन् । स्थानीयवासीले नगद सङ्कलन गरी बेपत्ता परिवारका आफन्तलाई सहयोग र सान्त्वना दिएका छन् ।
नेपालगञ्ज उपमहानगरपालिका–२० का कार्यवाहक वडाध्यक्ष चक्रबहादुर बुढाले भोटेकोशी बाढीमा परी थपुवा गाउँका पाँच जना बेपत्ता भएको पुष्टि गर्नुभयो । उहाँले बेपत्ताहरूको खोजी तथा परिवारलाई आवश्यक सहयोग र समन्वयका लागि काम भइरहेको बताउँदै आराम र उजनाका छोराछोरीलाई सहयोग गर्ने प्रतिबद्धता जनाउनुभयो ।
बाँकेका प्रमुख जिल्ला अधिकारी दिलकुमार तामाङका अनुसार भोटेकोशी बाढीपछि बाँके जिल्लाका २३ जना अझै बेपत्ता छन् । बाढीमा परी तीन जनाको शव सनाखत भई मृत्यु घोषणा गरिएको छ भने ३२ जनाको सकुशल उद्धार गरिएको छ ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।