चाडपर्वले सामाजिक सद्भाव र राष्ट्रिय एकता बलियो बनाउँछन् : प्रदेश प्रमुख मियाँ

सुदूरपश्चिम, २१ कात्तिकः सुदूरपश्चिम प्रदेश प्रमुख नजिर मियाँले तिहार, छठपर्व तथा नेपाल संवत्ले नेपाली समाजमा धार्मिक तथा सांस्कृतिक विविधताबीच आपसी सद्भाव, सहिष्णुता र राष्ट्रिय एकता बलियो बनाउने विश्वास व्यक्त गर्नुभएको छ ।

तिहार, छठपर्व तथा नेपाल संवत् ११४७ को अवसरमा आज शुभकामना सन्देश जारी गर्दै उहाँले तिहारलाई मानव र अन्य जीवजन्तुबीचको सुसम्बन्धको प्रतीकका रूपमा उल्लेख गर्नुभएको छ । तिहारमा काग, कुकुर, गाईलगायत गोवर्धन पर्वतको पूजाअर्चना गरी अन्तिम दिन दिदीबहिनी तथा दाजुभाइबीच भाइटीका लगाउने परम्पराले पारिवारिक आत्मीयता र आपसी सम्बन्धलाई प्रगाढ बनाउने उहाँले उल्लेख गर्नुभएको छ ।

प्रदेश प्रमुख मियाँले उज्यालो पर्व एवं दीपावलीका रूपमा समेत चिनिने तिहारमा देउसीभैलो खेल्दै आपसी सद्भाव अभिवृद्धि हुनुका साथै मौलिक संस्कृतिको पुस्तान्तरण हुँदै आएको उल्लेख गर्नुभएको छ । नेवार समुदायले म्हः पूजा गर्ने पर्व पनि यही अवसरमा पर्ने भएकाले यसको सांस्कृतिक महत्व अझ व्यापक रहेको उहाँको भनाइ छ ।

त्यसैगरी, छठपर्वले तराई तथा मधेस क्षेत्रको धार्मिक तथा सांस्कृतिक परम्परालाई प्रतिनिधित्व गर्ने उल्लेख गर्दै प्रदेश प्रमुख मियाँले यस पर्वमा सूर्य देवता र छठी माताको पूजाअर्चना गरिने परम्पराले प्रकृतिप्रतिको सम्मान र आस्थालाई अभिव्यक्त गर्ने बताउनुभएको छ । पछिल्लो समय नेपालको अन्य भूभागमा पनि छठपर्व मनाउने प्रचलनले यसको महत्त्व थप विस्तार भइरहेको सन्देशमा उल्लेख छ ।

नेपाल संवत्लाई राष्ट्रिय विभूति शङ्खधर साःख्वाद्वारा प्रवर्तन गरिएको मौलिक संवत्का रूपमा उल्लेख गर्दै प्रदेश प्रमुख मियाँले काठमाडौँ उपत्यकासहित नेवार समुदायको बाहुल्यता रहेका स्थानमा यसलाई नयाँ वर्षका रूपमा मनाइने परम्परा रहेको जनाउनुभएको छ । यी चाडपर्वले विश्वका विभिन्न स्थानमा छरिएर रहेका नेपालीबीच धार्मिक तथा सांस्कृतिक विविधताका बाबजुद आपसी सद्भाव, सहिष्णुता, भ्रातृत्व र पारस्परिक सहयोगको भावना अभिवृद्धि गर्ने विश्वास व्यक्त गर्दै उहाँले आफ्नो संस्कृति र परम्पराको संरक्षण, संवर्द्धन तथा विकासमा सबैलाई प्रेरित गर्ने अपेक्षा गर्नुभएको छ ।

“यी पर्वले सबैमा राष्ट्र र राष्ट्रियताप्रतिको गहिरो प्रेम, भ्रातृत्व, दिगो शान्ति तथा सामाजिक सहिष्णुताको भावना थप सुदृढ बनाउन प्रेरणा मिलोस्”, सन्देशमा उहाँले भन्नुभएको छ, “यस अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइमा सुख, समृद्धि, सुस्वास्थ्य एवं दीर्घायुको कामना गर्दछु ।”