१४ कात्तिक, सिरहा । दशैं सकिएसँगै तिहार, लक्ष्मीपूजा र छठपर्वलाई लक्षित गरी फूल बिक्री गर्ने तयारीमा रहेका सिरहाका किसान लगातार दुई दिन परेको वर्षाले फूल खेतीमा क्षति पुर्याएपछि निरास भएका छन् ।
फूल टिपेर बजार लैजाने तयारीमा रहेका किसानको महिनौँदेखिको मिहेनत वर्षाले नष्ट गरिदिएको हो ।
गोलबजार नगरपालिका–३ का किसान मनु स्याङ्दनले विगत १५–२० वर्षदेखि फूल खेती गर्दै आएको बताउँदै यस वर्ष ४ कठ्ठा जग्गामा सयपत्री फूल लगाएको जानकारी दिए ।
खेतीमा करिब एक लाख रुपैयाँ लगानी गरेका उनले चाडपर्वमा फूल बिक्री गरेर करिब चार लाख रुपैयाँ आम्दानी गर्ने अपेक्षा गरेका थिए । तर, वर्षाका कारण करिब २ हजार ५०० बोट फूल भुइँमा ढलेपछि लगानी र आम्दानी दुवै गुमेको उनले बताए ।
त्यस्तै, गोलबजार नगरपालिका–६ का किसान रुदल नायकको करिब ६ कठ्ठामा लगाइएको फूल खेतीमध्ये ३–४ कठ्ठाको फूल वर्षाले भुइँमा झारिदिएको छ ।
सोही वडाकी किसान इन्द्रकुमारी लामाले पनि ५ कठ्ठामा लगाएको सयपत्री फूलमा वर्षाले ठूलो क्षति पुर्याएको बताइन् ।
करिब १० वर्षदेखि फूल खेती गर्दै आएकी उनले तिहार, लक्ष्मीपूजा र छठपर्वमा फूल बिक्री गरेर करिब चार लाख रुपैयाँ आम्दानी गर्ने अपेक्षा गरेकी थिइन् ।
चाडपर्वको मुखमा फूल खेतीमा क्षति पुगेपछि लगानीसमेत डुब्ने अवस्था आएको भन्दै किसानहरू चिन्तित बनेका छन् ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।