सर्लाही । सीमाक्षेत्रमा हुने चोरी, तस्करी तथा अवैध गतिविधि नियन्त्रण गर्ने जिम्मेवारी पाएको सशस्त्र प्रहरी बलका केही अधिकारीमाथि नै तस्करसँग आर्थिक लेनदेन गरी अवैध कारोबारलाई प्रश्रय दिएको आरोप लागेको छ । जिल्लाको बिओपी सुन्दरपुर चौहर्वाका इन्स्पेक्टर डबल एडि र बिओपी संग्रामपुरमा कार्यरत सई राम एकबाल यादवमाथि स्थानीय तथा सम्बन्धित व्यक्तिहरूले विभिन्न आरोप लगाएपछि उनीहरूको कार्यशैलीमाथि प्रश्न उठेको हो ।
बिओपी सुन्दरपुर चौहर्वाका इन्स्पेक्टर डबल एडिमाथि तस्करीमा संलग्न व्यक्तिहरूसँग कथित रूपमा ‘महिनावारी’ रकम असुली गर्ने गरेको आरोप लागेको छ । रकम बुझाएर सामान ओसारपसारको काम सुरु गरेको भनिएकै पक्षको सामान पुनः नियन्त्रणमा लिएपछि उनी विवादमा तानिएका हुन् ।
नाम गोप्य राख्ने सर्तमा परिवर्तित नाम ‘सुनिता’ले नेपालप्रेस लाई फोनमार्फत यसबारे जानकारी गराएकी छन् । उनका अनुसार केही दिनअघि आफूले ‘लाइन’ बापतको रकम बुझाएर सामान ओसारपसारको काम सुरु गरेकी थिइन् । तर, महिना दिनसमेत नबित्दै पुनः सामान नियन्त्रणमा लिएपछि विवाद उत्पन्न भएको उनले बताएकी छन् ।
सुनिताको दाबीअनुसार, रकम बुझाएर काम सुरु गरेको केही समयमै सामान नियन्त्रणमा लिइएपछि आफूले बुझाएको रकम र त्यसको औचित्यमाथि प्रश्न उठेको हो । उनले यस घटनालाई लिएर सम्बन्धित सुरक्षाकर्मीको कार्यशैलीप्रति असन्तुष्टि व्यक्त गरेकी छन् ।
यसैबीच, इन्स्पेक्टर डबल एडिमाथि तस्करीमा संलग्न भनिएकी एक महिलासँग मोबाइल फोनमार्फत पटक–पटक सम्पर्क गरी आर्थिक लाभ लिएको आरोपसमेत लागेको छ । नेपालप्रेसलाई प्राप्त जानकारीअनुसार, इन्स्पेक्टरले प्रयोग गर्ने भनिएको मोबाइल ९८६७७३५२५३ नम्बरबाट ती महिलासँग पटक–पटक फोन सम्पर्क भएको विवरण रहेको दाबी गरिएको छ ।
यस विषयलाई गम्भीरतापूर्वक अनुसन्धान गर्ने हो भने सम्बन्धित मोबाइल नम्बरको कल डिटेल रेकर्ड (सीडीआर), सम्पर्कको समय, आवृत्ति तथा अन्य उपलब्ध प्रमाणको कानुनी प्रक्रियाबाट परीक्षण गर्दा घटनाबारे थप तथ्य खुल्न सक्ने देखिन्छ । फोन सम्पर्क भएको विवरणले मात्रै आर्थिक लेनदेन पुष्टि नगर्ने भएकाले त्यससँग सम्बन्धित अन्य प्रमाण तथा सम्बन्धित व्यक्तिहरूको बयानसमेत आवश्यक हुन्छ । त्यसैले सशस्त्र प्रहरीको माथिल्लो निकायले यस विषयमा निष्पक्ष र गम्भीर छानबिन गर्नुपर्ने माग उठेको छ ।
यता, बिओपी संग्रामपुरमा कार्यरत सशस्त्र प्रहरीका सई राम एकबाल यादवमाथि पनि तस्करी तथा लागुऔषध कारोबारमा संलग्न व्यक्तिहरूसँग आर्थिक लेनदेन गरेको आरोप लागेको छ । त्यहाँ कार्यरत इन्स्पेक्टर बिदामा गएको समयमा सई यादवलाई भने ‘दशैं नै लागेको’ स्थानीयले टिप्पणी गरेका छन् ।
स्थानीयका अनुसार इन्स्पेक्टर बिदामा रहेको समयमा सई यादवले लागुऔषध कारोबारीदेखि विभिन्न तस्करसम्मबाट रकम उठाएर तस्करीका गतिविधि सञ्चालन गर्न सहज बनाएका थिए । उनीमाथि अवैध कारोबारमा संलग्न व्यक्तिहरूसँग आर्थिक लाभ लिएर तस्करीलाई प्रश्रय दिएको आरोप स्थानीयले लगाएका छन् ।
सीमाक्षेत्रमा तस्करी नियन्त्रणका लागि खटिएका सुरक्षाकर्मीमाथि नै यसरी आर्थिक लेनदेन र अवैध कारोबारलाई संरक्षण दिएको आरोप लाग्नु गम्भीर विषय हो । यदि आरोपअनुसार सुरक्षाकर्मीले रकम लिएर तस्करीका गतिविधिलाई छुट दिइरहेका छन् भने त्यसले सीमा सुरक्षा र संगठनको विश्वसनीयतामाथि नै प्रश्न खडा गर्छ ।
यस विषयमा बिओपी सुन्दरपुर चौहर्वाका इन्स्पेक्टर डबल एडिसँग प्रतिक्रिया लिन पटक–पटक सम्पर्क गर्ने प्रयास गर्दा पनि सम्पर्क हुन सकेन । बिओपी संग्रामपुरका सई राम एकबाल यादवको प्रतिक्रिया पनि प्राप्त हुन सकेको छैन ।
यस्ता आरोपलाई सामान्य रूपमा लिनुभन्दा सशस्त्र प्रहरी बलका सम्बन्धित उच्च निकायले गम्भीरतापूर्वक अनुसन्धान गर्नुपर्ने देखिन्छ । विशेषगरी सम्बन्धित अधिकारीहरूको फोन सम्पर्क विवरण, सम्भावित आर्थिक लेनदेन, तस्करीका घटनामा गरिएको कारबाही तथा नियन्त्रणमा लिइएका सामानको विवरणसमेत छानबिनको दायरामा ल्याउनुपर्ने देखिन्छ ।
यद्यपि, सम्बन्धित अधिकारीहरूमाथि लगाइएका आरोपहरूको स्वतन्त्र पुष्टि हुन बाँकी छ । आरोपका आधारमा मात्रै कसैलाई दोषी ठहर गर्न मिल्दैन । निष्पक्ष अनुसन्धानबाट वास्तविकता सार्वजनिक गरी दोषी देखिए कानुनअनुसार कारबाही र आरोप निराधार देखिए सम्बन्धित अधिकारीलाई स्पष्ट हुने गरी विषय टुंग्याउनु आवश्यक छ ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।