जनकपुर, १७ कात्तिकः मधेस प्रदेशसभाका सभामुख रामअशिष यादवले खेलकुदको विकाससँगै ग्रामीण क्षेत्रका प्रतिभावान् खेलाडीलाई प्रोत्साहन गर्नुपर्नेमा जोड दिनुभएको छ ।
मिथिला बिहारी नगरपालिका–१ मा आयोजित भूतही लिग क्रिकेट प्रतियोगिताको उद्घाटन गर्दै सभामुख यादवले खेलाडी राष्ट्रको गौरव भएको उल्लेख गर्नुभयो । देश सङ्घीयतामा गएपछि ग्रामीण क्षेत्रमा खेलकुद तथा खेलाडीप्रति सम्मान र आकर्षण बढ्दै गएको उहाँले बताउनुभयो ।
सभामुख यादवले खेलकुदले युवामा अनुशासन, आपसी सद्भाव र प्रतिस्पर्धात्मक क्षमताको विकास गर्नुका साथै राष्ट्रिय पहिचान स्थापित गर्नसमेत महत्त्वपूर्ण भूमिका खेल्ने बताउनुभयो । मिथिला बिहारी नगरपालिका–१ का कार्यवाहक अध्यक्ष अजय यादवको अध्यक्षतामा सम्पन्न उद्घाटन समारोहमा नगरप्रमुख राजेन्द्र यादव र प्रमुख प्रशासकीय अधिकृत उपेन्द्र न्यौपानेले प्रतियोगिताको सफलताको शुभकामना व्यक्त गर्नुभएको थियो ।
मिथिला बिहारी नगरपालिका–१ को आयोजना तथा श्री महारानी माई क्रिकेट टोलीको संयोजनमा सञ्चालन भएको प्रतियोगितामा नगरपालिकाका विभिन्न वडाका ३२ वटा क्रिकेट टोली सहभागी रहेको युवा अभियन्ता सन्तोषकुमार मण्डलले जानकारी दिनुभयो ।
प्रतियोगिताले स्थानीयस्तरमा क्रिकेट खेलको विकास, प्रतिभावान् खेलाडीको पहिचान तथा युवालाई खेलकुदतर्फ आकर्षित गर्न सहयोग पुग्ने आयोजकले विश्वास लिएको छ ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।