काठमाडौँ, १९ कात्तिकः प्रहरीले डलर ठगी तथा लुटपाटमा संलग्न रहेको आरोपमा एक जनालाई गोली प्रहार गरी पक्राउ गरेको छ ।
काठमाडौँको गोकर्णेश्वर नगरपालिका–३ स्थित गाम्चामा प्रहरीले दुई राउन्ड गोली प्रहार गरी सिन्धुपाल्चोक बाह्रबिसेका सुजन तामाङलाई आज पक्राउ गरेको हो ।
जिल्ला प्रहरी परिसर काठमाडौँका प्रमुख एवं प्रहरी वरिष्ठ उपरीक्षक (एसएसपी) दिलीप घिमिरेका अनुसार पक्राउ गर्ने क्रममा तामाङले प्रहरीमाथि धारिलो हतियारले आक्रमण गरेपछि हवाई फायर र घुडामुनि गोली प्रहार गरिएको थियो ।
डलर ठगी तथा लुटपाटमा संलग्न रहेको आरोपमा उनलाई नियन्त्रणमा लिन प्रहरीले गोली चलाउनुपर्ने अवस्था सृजना भएको एसएसपी घिमिरेले जानकारी दिनुभयो । घटनाबारे थप अनुसन्धान भइरहेको जिल्ला प्रहरी परिसर काठमाडौँले जनाएको छ ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।