काठमाडौँ, २० कात्तिकः नेपालमा कृषि यान्त्रीकरण तथा आधुनिक कृषि प्रविधिको प्रवर्द्धन गर्ने उद्देश्यले आठौँ अन्तरराष्ट्रिय कृषि यान्त्रीकरण प्रदर्शनी-२०८३ आयोजना हुने भएको छ ।
आगामी मङ्सिर ४ देखि ६ गतेसम्म काठमाडौँको भृकुटीमण्डपस्थित प्रदर्शनी हलमा हुने प्रदर्शनीमा २० देशका दुई हजारभन्दा बढी प्रकारका कृषि औजार, उपकरण, यन्त्र तथा प्रविधि प्रदर्शन गरिने भएको छ ।
नेपाल कृषि मेशिनरी व्यवसायी सङ्घका अनुसार तीनदिने प्रदर्शनीमा १५० भन्दा बढी स्टल रहनेछन् । प्रदर्शनीमा प्रवेश निःशुल्क हुनेछ ।
स्वदेशी कृषि यन्त्र, उपकरण तथा प्रविधि उत्पादकलाई प्रोत्साहन गर्ने उद्देश्यले करिब ३० वटा स्टल स्वदेशी उत्पादक कम्पनी तथा संस्थालाई निःशुल्क उपलब्ध गराइनेछ । यस्तै, ‘मेक इन नेपाल’ तथा ‘मेड इन नेपाल’ कम्पनीलाई स्टल भाडामा ६० प्रतिशत, सङ्घका सदस्यलाई ५० प्रतिशत र अन्य नेपाली कम्पनीलाई २५ प्रतिशत छुटको व्यवस्था गरिएको छ ।
प्रदर्शनीमा आधुनिक कृषि, पशुपन्छीपालन, मत्स्यपालन, पुष्पखेती, व्यावसायिक तरकारीखेती, सिँचाइ, बाली भित्र्याएपछिको व्यवस्थापन, प्रशोधन तथा बजारीकरणसम्बन्धी आधुनिक यन्त्र, उपकरण र प्रविधि प्रदर्शन गरिनेछ । साथै, बीउबिजन तथा कृषि र पशुपन्छीसम्बन्धी सेवा प्रदान गर्ने राष्ट्रिय तथा अन्तरराष्ट्रिय उत्पादक र विक्रेताको सहभागिता रहनेछ ।
प्रदर्शनीको आयोजकमा कृषि विभागअन्तर्गतको राष्ट्रिय कृषि इञ्जिनियरिङ तथा यान्त्रिकीकरण प्रवद्र्धन केन्द्र, हरिहरभवन र नेपाल कृषि मेशिनरी व्यवसायी सङ्घ रहेका छन् । बागमती प्रदेश सरकारको कृषि, पशुपन्छी, वन तथा वातावरण मन्त्रालय र संयुक्त राष्ट्रसङ्घीय खाद्य तथा कृषि सङ्गठन सहआयोजकका रूपमा रहेका छन् ।
नेपालको कृषि तथा पशुपन्छीपालन क्षेत्रलाई यान्त्रिकीकरण, औद्योगिकीकरण, आधुनिकीकरण र व्यावसायिकीकरण गर्न सहयोग पुर्याउने उद्देश्यले प्रदर्शनी आयोजना गर्न लागिएको हो । एउटै स्थानमा आधुनिक कृषि तथा पशुपन्छीपालनका उपकरण, मत्स्यपालन, सिँचाइ, शीतभण्डार, बाली भित्र्याएपछिको व्यवस्थापन तथा प्रशोधन प्रविधि, तरकारीखेती, पुष्पखेती, नर्सरी र बीउबिजनसम्बन्धी जानकारी उपलब्ध गराउनु प्रदर्शनीको उद्देश्य रहेको आयोजकले जनाएको छ ।
प्रदर्शनीमार्फत उपभोक्ता तथा नीतिनिर्मातालाई कृषि यान्त्रीकरणका नवीनतम प्रविधिबारे जानकारी गराउनुका साथै कृषि यन्त्र तथा उपकरणको प्रचारप्रसार गरी कृषि यान्त्रीकरणको विस्तारमा सहयोग पुग्ने अपेक्षा गरिएको छ ।
प्रतिक्रियाहरू जाँचपछि मात्र प्रकाशित हुन्छन्। पीडित, नाबालक वा अभियुक्तको नाम नलेख्नुहोस् र आरोप नलगाउनुहोस्। त्यस्ता प्रतिक्रिया हटाइनेछन्।